ALBÍZARAS!: Bernardino Graña nomeado académico da lingua

.
.

.
ODA AO BERNARDINO DE CANGAS

.

Amais do vento e as cachoeiras tamén nos roubaron
a república do mar.
Na academia dos mariños: arroases, bocareos, sentolos e
sentolas, chinchos, dentudos, escarapotes, fodóns, ghalos e ghaliñas,
hipocampos, iscas, lapas peghadisas, melghachos,
nécoras fransesas, ourisos ou peludos, palometas, quenllas,
robalisas, santiaghiños; mesmo tartarughas, umbrelas, vellos,
xardas e samburiñas..., entre outros,
o home da barba senta
no “P” maiúsculo do patrucio.

.
Amais do cantil e as areeiras tamén nos roubaron
a república do mar.
Na asemblea dos voadores: araos, biluricos, corvos mariños,
escribentas e flaminghos, ghaivotas e ghaivotóns, liorteiros, masaricos,
neghróns; mesmo ostreiros, pardelas sinsentas,
rascóns e somorghullos..., entre outros,
o home dos anteollos senta
no “P” maiúsculo do poeta.

.
Amais do esteiro e os baixíos tamén nos roubaron
a república do mar.
No parlamento dos terreiros: albitornos, bughallóns, camariñas,
chuchameles, espadanas e fionllos, gharrouchas, herbas de namorar,
leitarughas, mentrastes, nosas, ollos de boi, papoulas, queirughas,
rudas e seoanes; mesmo trobiscos, uvas do can,
verdellos e xunqueiras..., entre outros,
o home do poncho senta
no “P” maiúsculo do profeta.

..
Xinete das baleas, meu pesco,
verso fresco traes, vén saltando nas patelas:

.
proa, ribadeo, fos, salabardo, bourel, lancha do xeito,
ballouco, burela, seleiro, poutada, traíña, secadeiro,
cabo, viveiro, ortigheira, buseta, xareta, masacote,
barlovento, cariño, sedeira, risón, cardume, rapeta,
batea, ferrol, ares, pontedeume, quiñón, serco real,
bolo, sada, coruña, caión, tralla, xávegha, boliche,
brasa, malpica, corme, cope, tarrafa, tasca mariñeira,
calma, laxe, camelle, peirao, trasmallo, caldeirada,
caiúco, camariñas, muxía, corcubión, chapapote,
escota, pandullo, bote, gharabeta, liña, meio mundo,
chicote, fisterra, see, racú, temón, ansol, chalana,
cho, carnota, muros, noia, volanta, áncora, ghamela,
lanse, portosín e son, esparavel, palanghre, ardora,
vaca, aghiño, ribeira, pobra, estrobo, embalo, dorna,
vergha, bita, morto, leme, chumbo e cortisa,
redeira, boiro, rianxo, vilagharsía, espulleira,
corricán, vilanova, cambados, raño, angharello, trabuquete,
nasa, ghrove, portonovo, sanxenxo, milla, escabeche,
anghaso, combarro, a boa vila, marín, arpeu, rasqueta,
norai, bueu, aldán, canghas, dinito, mera, tolete,
salasón, vigho, panxón, lonxa, baiona, peixe, a ghuarda e popa...;
pra que anden ghordos todos os nenos.

Amais do herdo e a honra, o pote do caldo i a manta da cama,
tamén nos roubaron a república do mar.

.
Espile, océana. Dacabalando os carrís da maré,
a peixespada, serra e martelo, escorda os marcos da cobiza.
Arreponte, mar de bronce, gholpe de mar,
okupa o usurpado a malas artes.
Sírvete dos que a ti acoden coma horta e bálsamo. Válete
dos cociñados no teu prebe, á túa imaxe e singradura,
reencárnate, outra volta, no teu máis feito capitán:
á sombra e amor do Bernardino, o fillo do mestre, o mestre,
o polisón, o marabunto, o home que quixo vivir, o afiador,
o lisensiado Ghraña, o raposo do Morraso, o vello vedoiro,
o irmán maior, oh caro persebeiro!...;
nácara e arghaso coma ti, marusía rolando a forte marusía
pailebote branco, bruxo, druída e bardo da aldea peláxica,
e teima, e recunca, e acorda, e trasacorda,
de cabo de Home e punta do Cabalo de Fóra...;
coma ti, de augha e lúa até as orellas.

.
Aliás, voghar-sear espido cara ao redomuíño, vou á valgha,
pois nesas estou mentres a vós poño rumbo, vou nun bou,
burro completo, fartiño de comer ouro, pasmado ante todo,
aboio, respiro, latexo, mentres furgo nos pecios que abandonei
e malvivo prostituíndo as sereas de pescanova.
Mil voltas máis, torreiro, guieiro amigo, xa case vexo Vigho,
xa case, Canghas, xa safo... Hoxe, se quixeren as luces do ceo,
durmirei pé en terra e heime soñar larghando o aparello
na túa xenerosa pesqueira, fasendo maghiñas, para mañá
ter compango que levar á boca.

.

Poema incluído en Bernardino Graña. Homenaxe no 75 aniversario (2007)

.