.
.
.
Semella que foi onte, mais xa van alá dez anos de estudo (recolleita de patrimonio inmaterial, inventario de patrimonio arqueolóxico, denuncia da desfeita provocada coa instalación do parque eólico...) e, asemade, promoción (visitas guiadas, charlas, libros, documentais...) do monte do Seixo, a Montaña Máxica.
Hoxe, sábado 7 de xullo de 2012, voltei a Portalén, guiando un grupo de entusiastas (unhas vinte persoas) que, desafiando as adversas condicións meteorolóxicas, atravesaron (atravesamos) o soarego do Outro Mundo.
Pouquiño e pouco, sen alardes nin estridencias, achegámonos á cifra dos 2.000 visitantes. 2.000 romeiros, aos que tiven a honra de acompañar, na procura da contemplación (malia que fugaz) dos predios do Máis Alá.
Hoxe, tras a soleira de Portalén, ao descubrir na pedra regañada os candeeiros, os cirios, as moedas... que outros romeiros veñen pousando en sinal de ofrenda, sentinme, coma nunca, parte da lenda.
Custa crelo, mais en todo este tempo, ningunha das administracións amosou interese polos incuestionábeis recursos do monte do Seixo. Nada me abraia xa, as xoias da nosa cultura amoréanse nos garaxes.
.
.
.
.
.
. 
.
.
. 
.
.
.
No hay comentarios:
Publicar un comentario